وكثير أوي بيبني القلب من كتر الوجع حواليه مليون سور بس عشان ميتألمش تاني ..

وتمر الأيام… وتتغير الظروف.. وينتهي كل تصرف كان بيألمه..

لكن لسه كل سور في يوم بناه موجود في مكانه مبيتزحزحش!

كل تصرف حلو ممكن يكون بيسمح بالقبول .. وبيطيب الجرح..

بس الأوجاع القديمة اللي اتبنت من سنين لسه واقفة عالية صعب تنهار ..

ويعمل ايه انهيار سور واحد في قلب مُحاط بالأسوار!

ويفضل القلب بيراقب جمال الحضور .. تغيير للأفضل وحب من اللي كان بيتمناه من زمان..

لكن مش بإيده إن قلبه كسرته مبتتصلحش .. واقف نفسه يستقبل الحب بس الواقع مبيتغيرش ..

وللأسف الشخص اللي وجعك .. لما بيبدأ يتغير ويقرب ويمد ايده ليك..

نَفَسُه بيتقطع لو ملقاش منك تجاوب .. ويفضل يتجرح فيحمل جواه هو كل ألم يخليه يبني أسواره ..

فالفجوة بينكم تزيد وتكبر ..

فأصبحت واقف بين قلبك المكسور .. واحساسك إنك هيفوتك التغيير ..

مين هيفضل مستنيك لغاية ما تتعافى؟

مين هيستحمل عدم تجاوبك وبرود المواقف؟

مين هيصبر لغاية ما يسترجعك من تاني؟

ده رغم أنه هو اللي وجع قلبك من الأول .. لكن على ما تاخد وقتك وتتعافى هيكون هو اتغير من تاني!

وتبقى أنت اللي خسرت..

خسرت قلبك اللي كان بيحب بصدق..

وخسرت قلبه لما حبك بصدق..

وانت مخترتش تخسر في الحالتين!

بس حقك تاخد وقتك .. حقك توضح أنه غصب عنك ..

واللي سبب لك وجع هيستحمل فاتورة ألمه ليك ..

ولو عايزك من تاني هيستنى اليوم اللي هيرجع لقلبك الأمان وينور من جديد!

اللي بيحبك بجد .. هيتفهم حالتك.. ويداوي جرحك .. ويحتوي ألمك ..

فيهد أسوارك من غير كلام .. لكن بجمال الأفعال .. وصبر مالوش حدود..

ودلوقتي هتضطر تستسلم للواقع يرسم لك الطريق ..

وإيمانك إن صبرهم حتى تعافيك .. اختبار حيوضح حبهم الحقيقي ليك..

قلب_مُحاط_بالأسوار #الحب_هو#

©2018 Dina Al-Mahdy All Rights Reserved